Benedikt Bóas Hinriksson, blaðamaður á Fréttablaðinu var gestur í öðrum þætti 433.is sem sýndur var á Hringbraut á þriðjudaginn. Benedikt ræddi þar við Hörð Snævar Jónsson um lélegt gengi Liverpool í ensku úrvalsdeildinni.

Eftir frábært gengi á síðasta tímabili þar sem Liverpool var Englandsmeistari, situr Liverpool nú í 8. sæti ensku úrvalsdeildarinnar með 43 stig eftir 28 leiki.

Benedikt segir að það sé erfitt að benda á eitthvað eitt sem hefur verið að hjá Liverpool á leiktíðinni.

„Hvað er hægt að segja? Þegar að þú hringdir í mig og bauðst mér í þáttinn til þess að ræða Liverpool þá held ég að ég sé búinn að finna svona 350 greinar þar sem er reynt að greina gengi liðsins.“

Liverpool hefur verið að glíma við mikil meiðslavandræði á tímabilinu, þá allra helst í öftustu línu þar sem miklu hefur munað um fjarveru Virgil Van Dijk og Joe Gomez en þeir hafa verið lengi frá.

„Það er hægt að segja meiðsli, þreyta, áhorfendaleysi þannig að hvatningin hvarf. Áhorfendur geta alltaf einhvern veginn barið þig áfram og áhorfendur á Anfield eru þannig að þú ferð út á völl sem leikmaður og berst fyrir fólkið í stúkunni. Núna eru náttúrulega engir áhorfendur, það er ekkert sem keyrir menn áfram.“

Þá er það tilfinning Benedikts að það fylgi Klopp ekki lengur sami kraftur og á sama tímabili.

„Mér fannst eins og Klopp væri svolítið, ég vill ekki segja líflaus en það er ekki sama stemmning yfir honum, ekki sami kraftur. Það er hins vegar galið að vera tala eitthvað um að skipta um þjálfara.“

Liverpool mætir Wolves á útivelli á mánudaginn næstkomandi og þarf nauðsynlega á þremur stigum að halda.

Viðtalið við Benedikt Bóas og þáttinn í heild sinni má sjá hér fyrir neðan.