Manchester United stóð til boða að fá Cristiano Ronaldo frá Juventus síðasta sumar en afþakkaði boðið, sömu sögu er að segja af PSG. Forráðamenn Juventus eru sagðir skoða það alvarlega að losa sig við Cristiano Ronaldo ef sá möguleiki verður fyrir hendi í sumar. Ástæðan er slakt gengi í Meistaradeild Evrópu síðustu þrjú ár.
Ronaldo er á sínu þriðja tímabili með Juventus en liðið hefur aldrei farið lengra en átta liða úrslit á þeim tíma. Í gær féll liðið úr leik í 16 liða úrslitum gegn Porto. Ronaldo er með 28 milljónir evra í árslaun hjá Juventus og fékk félagið hann aðeins með það eina markmið að vinna Meistaradeildina. Ronaldo á rúmt ár eftir af samningi sínum við félagið.
„Fer hann?,“ sagði Emanuele Gamba blaðamaður hjá Calciomercato. „Ég held að möguleikinn hafi í raun verið fyrir hendi síðasta sumar, starfsmenn hans reyndu það.“
„Jorge Mendes fór út og reyndi að finna lið en það gekk ekki. Ég efast um að ári síðar vilji einhver taka Ronaldo.“
„Mendes bað PSG og Manchester United um að láta til skara skríða en bæði félög afþökkuðu það. Ég sé ekki neitt gerast í Evrópu.“
