Manchester City tók á móti grönnum sínum í Manchester United í ensku úrvalsdeildinni í gær. Leikurinn endaði með 2-0 sigri Manchester United en leikið var á heimavelli City, Etihad Stadium. Manchester City hafði fyrir leikinn í dag unnið 21 leik í röð og freistaði þess að halda sigurgöngunni gangandi.

Strax á 2. mínútu leiksins fékk Manchester United vítaspyrnu. Bruno Fernandes tók spyrnuna og kom gestunum yfir. Þannig stóðu leikar allt þar til á 50. mínútu þegar að Luke Shaw tvöfaldaði forystu Manchester United með marki eftir stoðsendingu frá Marcusi Rashford.

Gary Neville segir að Shaw sé besti vinstri bakvörður deildarinnar um þessar mundir en óttast að hann meiðist fari Ole Gunnar Solskjær ekki varlega með hann á næstunni.

„Hann hefur verið magnaður á þessu tímabili, hann hefur verið heill heilsu, í góðu líkamlegu formi og með sjálfstraust. Hann er besti vinstri bakvörður Englands í dag,“ sagði Neville eftir leikinn.

„Að allir þessir hlutir séu í lagi á sama tíma hefur líklega ekki gerst á ferli Shaw. Það hefur verið vandamál en hann hefur verið frábær núna.“

Neville hefur áhyggjur af því að Shaw meiðist fari Solskjær ekki varlega með hann. „Við höfum séð það á síðustu vikum að hann fer niður í leikjum, hann virðist vera að ganga á þolmörk líkamans. Það veldur mér smá áhyggjum, það er mikilvægt fyrir Ole Gunnar Solskjær að stýra álaginu á honum næstu vikurnar.“