Rangers varð í dag Skotlandsmeistari í fyrsta skiptið síðan árið 2011, þetta varð ljóst eftir að Celtic mistókst að vinna Dundee United á útivelli. Ekkert lið getur nú náð Rangers sem situr á toppi skosku deildarinnar.

Steven Gerrard, knattspyrnustjóri liðsins var sigurreifur í viðtali hjá BBC í dag. Gerrard tók við Rangers árið 2018, hans fyrsta starf sem knattspyrnustjóri.

„Það er mjög erfitt að koma því í orð núna hvernig mér líður. Ég svíf um á bleiku skýi, þetta er ferðalag sem er ekki lokið,“ sagði Gerrard.

Rangers er sem stendur með 20 stiga forskot í deildinni og hefur ekki tapað leik á tímabilinu. Gerrard segir að þessi sigur sé ekki endapunktur heldur upphaf.

„Við eigum meira inni, hjá mér er það þannig að þegar að þú vinnur eitthvað, þá kemurðu að spurningunni hvað gerist næst?. Ég er mjög stoltur af leikmönnunum,“ sagði Steven Gerrard, knattspyrnustjóri Rangers

„En þeir eru ekki eins mikilvægir og stuðningsmennirnir, það eru þeir sem gera félagið að því sem það er, þetta er fyrir þá,“ sagði Steven Gerrard.