Paul Gascoigne einn besti knattspyrnumaður sem England hefur alið af sér hefur háð harða baráttu við bakkus síðustu ár, hann hefur farið í fjölda meðferða og oft verið á slæmum stað í lífinu.

Gascoigne hefur lengi talað um vandamál sín með áfengi og fíkniefni, þrátt fyrir að vita af vandamáli sínu hefur Gascoigne tekið þá ákvörðun að byrja að drekka aftur.

Ensk blöð fjalla um málið og kemur fram að margir sem eru nánir Gascoigne hafi miklar áhyggjur, óttast er að hann fari í sama farið. Gascoigne hefur oft verið nær dauða en lífi eftir miklar tarnir, hann segist í taka hafa góð tök á drykkjunni.

„Ég verð alltaf alkóhólisti, núna get ég fengið mér nokkur glös af víni. Ég fæ mér nokkra bjóra, en ekki á hverjum degi. Ég fæ mér í glas þegar ég vil,“ sagði Gascoigne í viðtali við ensk götublöð.

„Ég fæ mér í glas þegar ég fæ löngun til þess, ef mig langar í drykk þá fæ ég mér drykk. Ef ég vil ekki drykk, þá sleppi ég því. Ég hef alltaf verið svona.“

Þessi fyrrum knattspyrnumaður segist vera með góð tök á málunum í dag. „Ég fæ mér ekki sterkt áfengi, ég sleppi því alveg. Ég ræð mjög vel við drykkjuna núna og nýt lífsins.“