Yaya Sanogo, fyrrverandi framherji Arsenal, er mættur aftur í enska boltann en hann hefur gert samning við Enska B-deildar liðið Huddersfield Town út tímabilið.
Sanogo var síðast á mála hjá franska liðinu Toulouse en samningi hans við félagið var rift.
Sanogo gekk til liðs við Arsenal frá Auxerre árið 2013, hjá Arsenal spilaði hann 20 leiki, skoraði eitt mark og gaf eina stoðsendingu.
Sanogo er ekki eina dæmið um leikmann sem hefur átt erfitt uppdráttar hjá Arsenal. Daily Star, hefur tekið saman nokkur dæmi um slíkt.
Svíinn, Kim Kallström kom til Arsenal á láni frá Spartak Moskvu í janúar árið 2014. Kallstrom kom meiddur til Arsenal og spilaði aðeins fjóra leiki fyrir félagið.
Marouane Chamakh, gekk til liðs við Arsenal frá franska liðinu Bordeaux þar sem hann hafði öðlast mikla reynslu, spilað 301 leik, skorað 74 mörk og gefið 24 stoðsendingar.
Chamakh náði sér aldrei á almennilegt flug hjá Arsenal, hann spilaði 67 leiki á þriggja ára tímabili, skoraði 14 mörk og gaf tíu stoðsendingar
Denis Suarez gekk til liðs við Arsenal á láni frá Barcelona. Suarez er alinn upp í hinni virtu La Masia akademíu Börsunga en náði sér aldrei á flug með Arsenal. Hann spilaði aðeins 67 mínútur í ensku úrvalsdeildinni.
