Everton hafði betur gegn Liverpool í gær í baráttunni um Bítlaborgina. Leikurinn endaði með 2-0 sigri Everton en þetta var fyrsti sigur Everton á Anfield í ensku úrvalsdeildinni síðan árið 1999.
Það sló í brýnu milli Jurgen Klopp, knattspyrnustjóra Liverpool og Duncan Ferguson, aðstoðarþjálfara Everton á einum tímapunkti í leiknum.
Klopp ásamt leikmönnum Liverpool vildi fá vítaspyrnu í seinni hálfleik en dómari leiksins var ekki sammála.
Ferguson á að hafa hlegið að þessari beiðni Klopp.
„Að hverju ert þú að hlægja?“ á Klopp að hafa spurt Ferguson í kjölfarið.
„Við höfum rétt á því að tjá okkur eða eru það einungis þið sem megið það“ á Ferguson að hafa svarað.
Ferguson er öllum hnútum kunnugur í nágrannaslag Liverpool og Everton. Hann spilaði um langt skeið með Everton og hefur nú verið hluti af starfsliði aðalliðs félagsins síðustu tímabil.
Liverpool hefur ekki gengið nægilega vel á tímabilinu eftir að hafa hampað Englandsmeistaratitlinum á síðasta tímabili. Liðið situr í 6. sæti deildarinnar með 40 stig eftir 25 leiki, 16 stigum frá toppliði deildarinnar, Manchester City.
Það var ljóst að sigur Everton, skipti leikmenn liðsins miklu máli en út brutust mikil fagnaðarlæti eftir sigur gærdagsins. Gylfi Þór Sigurðsson skoraði seinna mark leiksins úr vítaspyrnu.
What it means @ped @Everton pic.twitter.com/IF33qiDMY1
— Paul misses #Team1040 (@five15design) February 20, 2021
