Jurgen Klopp, stjóri Liverpool, vill að leikmenn sínir beini reiðinni sinni á réttan stað í leik liðsins gegn Gylfa Þór Sigurðssyni og félögum hans í Everton í dag. Um er að ræða seinni leik liðanna á tímabilinu en stuðningsmenn og leikmenn Liverpool eru skiljanlega ennþá reiðir eftir fyrri leik liðanna.

Liverpool og Everton spiluðu í október á síðasta ári í afar örlagaríkum leik en segja má að leikurinn hafi verið upphafið að hrakförum Liverpool á tímabilinu. Leikurinn endaði með 2-2 jafntefli eftir að mark Liverpool á lokamínútunum var dæmt af, mörgum til mikillar reiði. Ekki nóg með það þá meiddist Virgil van Dijk í leiknum en hann hefur verið einn mikilvægasti hlekkurinn í velgengni Liverpool undanfarið.

Klopp tjáði sig um leikinn fyrr í vikunni og sagði að mikil reiði hafi verið í búningsklefanum eftir að Jordan Pickford, markmaður Everton, meiddi van Dijk með glæfralegri tæklingu sinni. Van Dijk er ennþá meiddur og afar ólíklegt er að hann spili meira á tímabilinu. „Ekkert af þessu [reiðinni] verður tekið með í leikinn á morgun, þannig er það bara,“ sagði Klopp.

„Viku seinna, tveimur vikum, eða þremur vikum eftir að við fengum niðurstöðurnar um meiðslin hjá van Dijk, það er gott að við spiluðum ekki aftur við Everton þá ef ég á að segja alveg eins og er,“ sagði Klopp og gaf í skyn að leikmenn hans hefðu ekki verið rólegir ef liðið hefði spilað aftur við Everton á þeim tíma. „Við erum öll manneskjur og auðvitað var þetta ekki gott en núna er þetta löngu búið. Við hugsum ekki um þetta meira, þetta er ennþá nágrannaslagur og það á að vera nóg til að hvetja þá til að spila sinn besta leik.“