Ray Parlour, fyrrverandi leikmaður Arsenal, telur að Pierre Emerick Aubameyang, framherji liðsins, hefði geta komist í lið Arsenal sem fór taplaust í gegnum tímabilið 2003/2004.

Aubameyang hefur átt erfitt uppdráttar á tímabilinu en virðist vera koma til baka. Hann skoraði þrennu í 4-2 sigri Arsenal um síðustu helgi. Framherjinn knái hefur spilað 132 leiki fyrir Arsenal síðan hann gekk til liðs við liðið, skorað 81 mark og gefið 16 stoðsendingar.

„Hann hefði verið frábær viðbót við ósigrandi lið okkar og í liðinu tímabilið 2001/2002, hvort sem hann hefði byrjað eða komið inn á, þið getið rétt ímyndað ykkur hvernig það hefði verið að skipta Aubameyang inn á þessum tíma,“ sagði Ray Parlour á Talksport.

Talksport báru saman tölfræði Aubameyang við framherja Arsenal á þessum tíma og aðeins Thierry Henry er með betri tölfræði.