Áhugaverð staða er uppi hjá Lionel Messi, einum besta knattspyrnumanni sögunnar en samningur hans við Barcelona er á enda í sumar.

Messi er frjálst að ræða við önnur félög en mikið hefur verið rætt og ritað um Messi og PSG síðustu vikur, franska félagið á sér þann draum að fá Messi til Parísar.

Messi gæti myndað öflugt teymi með Kylian Mbappe og Neymar í París en ekki er öruggt að félagið hafi efni á þremur stórstjörnum.

ESPN segir frá því að Manchester City hafi enn áhuga, félagið vildi fá Messi síðasta sumar en hann fékk ekki að yfirgefa Barcelona.

ESPN hefur eftir heimildarmanni að það séu mistök hjá PSG að tala mikið um málið í fjölmiðlum, það sé ekki sú leið sem Messi vill fara.

Ekki er útilokað að Messi verði áfram hjá Barcelona en það fer allt eftir því hver verður kjörinn forseti og hvort að félagið hafi fjármuni til að greiða honum þessi svakalegu laun sem hann vill. Barcelona glímir við mikla fjárhagsörðuleika.

„Það er góður möguleiki á því að Messi komi, við verðum að vera rólegir og láta málið þróast,“ sagði Angel di Maria leikmaður PSG á dögunum.