Þegar gerðir eru samningar við knattspyrnumenn er oftast rætt um lengd samnings, kaup og kjör en það geta einnig læðst inn undarlegar klásúlur og beiðnir, annað hvort af frumkvæði leikmannsins eða félagsins sem hann er að semja við.

Til að mynda var klásúla í fyrsta samningi Robert Lewandowski hjá Bayern Munchen um að hann mætti ekki gera áhættusama hluti sem gætu orðið til þess að hann myndi meiðast. Meðal þess sem Lewandowski var meinað að gera var að fara á skíði, í fjallaklifur og í svifflug. Lewadowski er mikið fyrir útivist og áhættusækna hluti, því var þetta mikilvægur hluti í samningsgerð forráðamanna þýska félagsins.

Rolf-Christel Guie Mien gekk til liðs við Frankfurt frá Karlsruher árið 1999. Meðal þess sem leikmaðurinn vildi hafa í samningi sínum var klásúla um að Frankfurt myndi greiða fyrir matreiðslunámskeið einkonu hans.

Japanski leikmaðurinn Keisuke Honda gekk í raðir Botafogo árið 2020. Það þýddi að hann þyrfti að flytja til brasilísku borgarinnar Rio De Janeiro sem er þekkt fyrir vera staður mikillar glæpastarfsemi. Honda krafðist þess að fá brynvarinn bíl til afnota ef hann myndi ganga til liðs við Botafogo og það fékk hann.

Þegar að Giuseppe Reina, gekk til liðs við Arminia Bielefeld árið 1996 krafðist hann þess að félagið myndi byggja fyrir hann hús fyrir hvert ár sem hann væri hjá félaginu. Hins vegar láðist honum að hafa með í samningnum hversu stórt húsið ætti að vera og því fékk hann einungis hús gerð úr Lego-kubbum næstu þrjú árin frá félaginu.