Vilhjálmur Kári Haraldsson hefur verið ráðinn þjálfari kvennaliðs Breiðabliks í knattspyrnu, hann tekur við starfinu af Þorsteini Halldórssyni sem ráðinn var landsliðsþjálfari kvenna á dögunum.

Vilhjálmur Kári hefur 25 ára reynslu af þjálfun karla og kvenna, bæði hjá FH og Breiðabliki. Þá hefur hann einnig starfað fyrir Knattspyrnusamband Íslands sem leiðbeinandi auk þess sem hann var aðstoðarþjálfari U17 ára landsliðs kvenna.

Síðasta starf Vilhjálms var hjá Augnabliki þar sem hann var þjálfari kvennliðs félagsins.

Vilhjálmur spilaði á sínum knattspyrnuferli einnig fyrir Breiðablik en hann á að baki 69 leiki fyrir félagið

„Breiðablik lýsir yfir mikilli ánægju að fá Vilhjálm til frekari starfa fyrir félagið. Það undirstrikar það sterka og faglega starf sem fram fer innan knattspyrnudeildarinnar og þann mikla auð sem til staðar er af þjálfurum og starfsfólki. Breiðablik leggur mikla áherslu á þjálfun og uppeldi yngri leikmanna, gefa þeim tækifæri og traust til að vaxa og ná árangri. Það að Vilhjálmur taki við Íslandsmeistaraliði Breiðabliks og heldur tengslum við Augnablik styður vel við þá stefnu, samhliða því að Blikar stefna alltaf að því að halda sínum sessi í fremstu röð á Íslandi,“ segir í yfirlýsingu Breiðabliks um ráðningu nýs þjálfara.

Starfslið Vilhjálms er klárt. Ólafur Pétursson verður aðstoðar- og markmannsþjálfari, Aron Már Björnsson styrktarþjálfari og Úlfar Hinriksson tæknilegur ráðgjafi. Þeir voru allir í teymi Þorsteins hjá Breiðablik sem varð Íslandsmeistari á síðasta tímabili

Breiðablik endaði í 1. sæti Pepsi-Max deildar kvenna á síðasta tímabili. Liðið tapaði aðeins einum leik á tímabilinu og endaði með 42 stig eftir 15 leiki þegar að mótið var blásið af vegna Covid-19 heimsfaraldursins.

Vilhjálmur Kári tekur við Blikum – Öflugt teymi https://t.co/Mch4fp4D5J

— Blikar.is (@blikar_is) February 4, 2021