Jurgen Klopp stjóri Liverpool segir að félagið verði að skoða það hvort hægt sé að kaupa varnarmann fyrir lok gluggans á mánudag.

Liverpool vann í gær sigur á Tottenham en það sem gerir sigurinn þó súrsætan eru meiðsli Joel Matip, varnarmaðurinn seinheppni meiddist illa á ökkla. Matip skaddaði liðbönd í ökkla og var Jurgen Klopp, stjóri Liverpool ekki glaður í bragði að leik loknum.

Fyrir eru Joe Gomez og Virgil van Dijk frá vegna meiðsla og óvíst er hvenær þeir fá að snúa aftur. Ætla má að Klopp reyni allt til þess að sannfæra stjórn félagsins um að kaupa miðvörð á næstu dögum.

„Við höfum hugsað um þetta allan tímann en þetta snýst um að gera það sem er rétt. Ég er ekki með neinar ofurkröfur,“ sagði Klopp.

„Við þurfum bara að finna rétta leikmanninn, við erum með leikmenn. Vissulega eru ekki margir varnarmenn, það er í raun ótrúlegt hvernig þetta hefur gerst.“