Skuldir Barcelona aukast jafn og þétt og óvíst er hvort eða hvernig félagið getur komið sér út úr þessari skuldasúpu sem hefur safnast upp.

Skuldastaða félagsins var ekki góð þegar COVID-19 veiran fór að hrella heimsbyggðina og hafa skuldirnar aukist jafnt og þétt síðasta árið. La Vanguardia, blað í Katalóníu segir að skuldir félagsins nálgist nú milljarð evra og óvíst er hvernig félaginu tekst að greiða þær niður. Það sem gerir stöðuna verri er að 420 milljónir evra eru á gjalddaga næsta árið.

Barcelona hafði reiknað með milljarði evra í tekjur á síðustu leiktíð en COVID-19 veiran kom í veg fyrir það. Tekjufallið hefur svo haldið áfram á þessari leiktíð vegna veirunnar.

Félagið skuldar svo öðrum félögum vegna leikmannakaupa um 200 milljónir evra, þetta kemur fram í gögnum sem voru opinberuð í gær.

Þannig skuldar Barcelona Liverpool fyrir Philippe Coutinho, Barcelona keypti hann fyrir þremur árum en félagið á enn eftir að borga 25 milljónir punda af 142 milljóna punda kaupverðinu.

Félagið skuldar fleiri félögum háar upphæðir og má þar nefna 52 milljónir evra fyrir Miralem Pjanic sem kom frá Juventus.