Hinn norski Martin Odegaard, mun að öllum líkindum fara til Arsenal á láni frá Real Madrid á næstu dögum. Félögin hafa náð samkomulagi sín á milli, þetta fullyrðir blaðamaðurinn Fabrizio Romano.

Arsenal var ekki eina liðið sem vildi fá Norðmanninn til liðs við sig. Real Sociedad, liðið sem Odegaard spilaði fyrir á síðasta tímabili, hafði einnig hug á að næla í kappann. Romano segir að símtal sem Ödegaard fékk frá Mikel Arteta, knattspyrnustjóra liðsins, hafi sannfært hann um að reyna fyrir sér hjá Arsenal.

Nú hefur verið greint frá því að Arsenal borgi 2,5 milljónir punda fyrir að fá Odegaard á láni út tímabilið. Um er að ræða 440 milljónir íslenskra króna en að auki borgar Arsenal laun hans, Odegaard er sagður þéna um 7 milljónir íslenskra króna á viku.

Leikmaðurinn verður á láni hjá Arsenal út yfirstandandi tímabil, búist er við að Odegaard fari í læknisskoðun hjá Arsenal í dag.

Ödegaard, gekk til liðs við Real Madrid frá norska liðinu Strömsgödset árið 2015. Hann hefur á sínum ferli einnig spilað með Heerenven, Vitesse og Real Sociedad.

Hann var skilgreindur sem undrabarn í knattspyrnu á sínum tíma en hefur átt erfitt með að fóta sig hjá Real Madrid eftir komu sína þangað. Hins vegar gekk honum vel hjá Real Sociedad á síðasta tímabili þar sem hann spilaði 36 leiki, skoraði 7 mörk og gaf níu stoðsendingar.