Liðsfélagarnir og knattspyrnustjörnurnar Eric Dier og Dele Alli, sem spila báðir með Tottenham, rifust harkalega eftir að þeir töpuðu gegn Wolves á síðasta tímabili.

Nýlega komu út þættirnir All or Nothing: Tottenham Hotspur á Amazon Prime. Í einum þáttana er fylgst með því sem átti sér stað í búningsklefa Tottenham eftir leik liðsins gegn Wolves. Staðan var 2-1 fyrir Tottenham í hálfleik en liðið endaði á að tapa leiknum 2-3. Þetta var þriðja tap liðsins í röð og gerði það möguleika Tottenham á að ná Meistaradeildarsæti afar litla.

„Hvernig í andskotanum töpuðum við þessum leik? Fokking eins í hverjum leik. Þrjú verstu mörk sem ég hef séð í lífi mínu. Alltaf sama vandamálið,“ sagði miðjumaðurinn Dele Alli eftir leikinn. Dier svaraði þá liðsfélaga sínum og hófst harkalegt rifrildi í kjölfarið. „Okei, gerðu þá eitthvað að minnsta kosti. Ekki sitja bara þarna eins og einhver ofdekraður krakki,“ sagði Dier við Alli.

„Ég er ánægður með það að ykkur líði svona eftir leikinn því við töpuðum,“ sagði José Mourinho, þjálfari liðsins, í kjölfar rifrildisins. „Þið verðið að vera kvikindislegir, þið verðið að vera klárir og þið verðið að brjóta á þeim.“