Þeir Eiður Smári Guðjohnsen og Logi Ólafsson tóku við FH í vikunni og stýrðu þeir liðinu til sigurs í fyrsta leiknum gegn Fjölni í gær. Eiður er af mörgum talinn vera besti knattspyrnumaður Íslandssögunnar en hann lék með Chelsea undir stjórn Mourinho og með Barcelona undir stjórn Frank Rijkaard. Þrátt fyrir mikla reynslu á vellinum þá er Eiður enn að stíga sín fyrstu skref í þjálfun.

Í útvarpsþættinum Fótbolti.net á X-inu 977 var rætt um þessa nýju þjálfara FH. „Hann er ekki reynslumikill þjálfari,“ sagði Baldvin Már Borgarsson, fréttaritari og aðstoðarþjálfari Ægiss, um Eið Smára. Baldvin heldur að Eiður sé að koma í þjálfunina með Loga með því að leiðarljósi að taka sjálfur við liðinu eftir þetta tímabil. Logi er gríðarlega reynslumikill þegar kemur að þjálfun en hann þjálfaði FH upp úr aldamótum. Þá hefur hann líka þjálfað íslenska landsliðið, ÍA, Selfoss, KR og Víking.

Elvar Geir Magnússson, ritsstjóri Fótbolta.net, segir að það gæti vel verið að Eiður muni taka næsta tímabil einsamall. „Hann ætlar sér flotta hluti í þjálfun. Maður hefur heyrt að hann sé með mjög öflugar æfingar,“ segir Elvar og ítrekar það hvað Eiður hefur mikla reynslu, auk þess hve stórt þetta er fyrir Pepsi Max-deildina.

„Ég vona að þetta sé einhver hugsun hjá FH að fá Eið inn með einhverjum reynslubolta því hann hefur ekkert þjálfað. Hann hefur örugglega eitthvað fáránlegt æfingasafn frá því að hann var að spila fyrir Frank Rijkaard og Mourinho. Hann er örugglega með góðan gagnagrunn. Hann hefur þetta. Hann getur klárlega orðið frábær þjálfari, en hefur ekki reynsluna.“

Rætt var við Valdimar Svavarsson, formann knattspyrnudeildar FH, í þættinum um ráðninguna. Valdimar segir að honum finnist þetta vera mjög spennandi lausn. „Logi er einn af fjölskyldunni og hefur mikið verið í kringum félagið í gegnum tíðina. Hann þekkir innviðina, félagið og liðið. Hann kemur með reynslu og þekkingu. Svo er Eiður með sína þekkingu, reynslu og dínamík. Hann á framtíðina fyrir sér sem þjálfari,“ sagði Valdimar.