Birkir Kristinsson, fyrrum landsliðsmarkvörður í fótbolta er í ítarlegu viðtali við Fótbolta.net. Þar fer hann yfir feril sinn en einnig um dvöl sína í fangelsi á Íslandi. Birkir átti frábæran feril sem knattspyrnumaður en starfaði síðan í Glitni fyrir hrun.

Birkir var viðskiptastjóri hjá Glitni. Hann var dæmdur í fimm ára fangelsi árið 2014 fyrir umboðssvik og markaðsmisnotkun sem og brotum á lögum um ársreikninga sem sneru að 3,8 milljarða króna láni Glitnis árið 2007 til félags sem var í eigu Birkis.

Birkir fór í fangelsi árið 2015 og vildi fara strax inn, þetta var rétt fyrir jólin 2015 en hann vildi ekki láta það bíða og krafðist þess að hefja afplánun um leið.

„Þetta var í sjálfu sér ömurleg tímasetning. Ég held að allar tímasetningar séu ömurlegar í þessu en erfitt rétt fyrir jól gagnvart fjölskyldunni og þeim sem standa mér næst. Það var erfitt en ég var búinn að ákveða að ef þetta færi á versta veg þá myndi ég hefja afplánun strax því ég vildi ekki hafa þetta yfir hausamótunum á mér,“ sagði Birkir í ítarlegu viðtali við Fótbolta.net.

„Ég fékk að fara inn viku seinna, kom inn á Skólavörðustíginn sunnudeginum á eftir og var fluttur á Kvíabryggju nokkrum dögum seinna. Ég var kominn þangað í kringum 20. des.

Hann segist ekki óska neinum þess að þurfa að sitja í fangelsi. „Þetta voru skrítnir tímar, ég óska engum þess að þurfa að sitja inni. Ég bað ekki um það og langaði ekki til þess en þegar það var kominn dómur var ekkert annað en að fylgja þeim dómi og bíta í það súra epli og takast á við það.“