Miðjumaðurinn Kristinn Steindórsson hefur skrifað undir samning við Breiðablik í Pepsi Max-deild karla.

Frá þessu er greint í dag en Kristinn hefur undanfarið verið að leita sér að nýju félagi.

Sumarið 2018 sneri þessi 29 ára gamli leikmaður aftur heim eftir langa dvöl í atvinnumennsku.

Kristinn yfirgaf Breiðablik árið 2011 og samdi við Halmstad. Síðar lék hann með Colombus Crew og GIF Sundsvall.

Hann hefur nú samið við Breiðablik á ný eftir tvö erfið ár hjá FH í Kaplakrika.

Kristinn á að baki þrjá landsleiki fyrir Ísland og var frábær fyrir Blika 2007 til 2011.

Tilkynning Blika:

Knattspyrnumaðurinn snjalli Kristinn Steindórsson hefur ákveðið að klæðast grænu treyjunni á nýjan leik.

„Það er virkilegt ánægjuefni að fá Kidda aftur heim. Hann mun styrkja liðið innan vallar og utan og ég horfi til þess að hann geti miðlað af reynslu sinni til yngri leikmanna okkar“ segir Óskar Hrafn Þorvaldsson þjálfari.

Kristinn sem varð bikarmeistari með Blikum árið 2009 og Íslandsmeistari árið 2010 á að baki 132 mótsleiki með meistaraflokki Breiðabliks og skoraði í þeim 44 mörk. Hann skoraði 9 mörk í 30 leikjum með landsliðum Íslands en hann spilaði 3 A-landsleiki og 27 leiki með yngri landsliðum Íslands.

Á árunum 2012 til 2018 lék Kristinn 162 leiki sem atvinnumaður í Svíþóð og í Bandaríkjunum en frá þeim tíma hefur hann leikið með FH.

Velkominn heim Kristinn!