90 mínútur, hlaðvarpsþátturinn er í fullu fjöri þessa dagana. Gestur þáttarins að þessu sinni er Just a kid from Darlo sem vann gullskóinn. Það hefur fátt annað verið rætt í sumar í Pepsi Max-deildinni en um Gary Martin. Framherjinn sem Valur fékk en sparkaði út eftir nokkra leiki. Hann fór í ÍBV og vann gullskóinn.

Gary Martin hefur átt áhugaverðan feril, farið víða og ræðir það allt í 90 mínútum. Hann segir meðal annars sögu frá árinu 2004. Þá var þessi litríki karakter gómaður við að stela af stórstjörnum, hann lék þá með Darlington, liðinu í heimabæ sínum.

,,Þetta fór svo að verða meiri alvarleiki í kringum 14 ára aldurinn, þá byrjaði Darlington með unglingastarf eftir að hafa byggt nýtt svæði. Við fórum í mót sem við unnum og vegna þess fengum við æfingaleik gegn Newcastle, sem fram fór á æfingasvæði þeirra. Frábær staður, við vorum vanir að fara á staði eins og Grimsby. Að spila gegn Newcastle, var stórt fyrir okkur,“ sagði Gary þegar hann rifjaði málið upp.

Gary og vinir hans í Darlington voru að skoða æfingasvæðið hjá stórliðinu þegar þeir komu að opnu herbergi, það var fullt af skóm.

,,Við vorum að skoða frábæra æfingasvæðið þeirra og komum að herbergi sem geymdi takkaskó, það var ákveðið að skoða það. Það var opið þar, ég hugsaði með mér að stela ölum þessum skóm Ég tók 4 eða 5 pör með mér, fór heim og seldi vinum mínum þá. Búa til smá pening.“

Gary hélt að hann hefði komist upp með það að stela skónum en svo var ekki.

,,Næsta dag hringir pabbi í mig, öskrar í símann og segir mér að ég hafi verið að stela skóm. Það sé til á myndbandi. Ég varð að gefa vinum mínum peninginn til baka og taka skóna, Darlington losaði sig við mig þá. Þá fór ég til Middlesbrough. Ég var rekinn fyrir að stela skóm.“

Um var að ræða skó sem enskir landsliðsmenn áttu, þar á meðal Kieron Dyer sem átti farsælan feirl.

,,Ég heyrði að þetta hefðu verið skórnir hans Kieron Dyer og einhver sagði Alan Shearer en ég var ekki með neina Umbro skó, svo það passar ekki. Ég var með par frá Kieron Dyer, ímyndaðu þér að mæta á æfingu og það eru ekki skór. Ég myndi ekki vilja það í Vestmannaeyjum, þú lifir og lærir. Þetta er góð saga, ég var bara krakki.“

Viðtalið við Gary er í heild hér að neðan.