Það byggjast upp vandamál sem Ole Gunnar Solskjær, stjóri Manchester United þarf að leysa. Það er að verða ljóst að United verður í vandræðum með að ná einu af efstu fjórum sætunum og mögulega einu af efstu sex sætunum.

Solskjær er að hreinsa til að og reyna að byggja upp nýtt lið, hann losaði nokkra leikmenn í sumar og sótti þrjá nýja. Harry Maguire, Aaron Wan-Bissaka og Daniel James hafa komið vel inn en það vantar fleiri menn.

Daily Mail fjallar ítarlega um málefni Solskjær í dag og þau vandamál sem hann er með. Eitt af þeim er sagt vera Kieran McKenna, aðstoðarmaður hans. McKenna er á sínu öðru ári með aðalliðið en var áður með U18 ára liðið, leikmenn liðsins eru ekki hrifnir af æfingum hans. McKenna stýrir mikið af æfingum sem leikmenn telja að eigi heima í yngri flokkum en ekki hjá aðalliði.

Patrice Evra, fyrrum bakvörður félagsins er að starfa hjá félaginu þessa dagana á meðan hann menntar sig sem þjálfari. Hann er sagður hissa á því hversu margir starfa í kringum Solskjær, það er eitthvað sem margir eru sammála. Starfsliðið er oft stórt og hlutverk manna ekki augljóst.

Þá er Marcus Rashford, framherji félagsins sagður vera mikið í fýlu. Eftir þessu hafi verið tekið síðustu vikur en framherjinn meiddist í tapi gegn West Ham um helgina.

Þá er mannskapur United þunnskipaður fram á við en Solskjær losaði Alexis Sanchez og Romelu Lukaku í sumar, án þess að styrkja sig fram á við.