Guðmundur Böðvar Guðjónsson er hættur sem leikmaður Breiðabliks, þetta kom fram í Dr. Football. Hlaðvarpsþættinum vinsæla í dag.

Guðmundur var ekki í leikmannahópi Blika gegn ÍBV í gær og vakti það athygli, hann hafði komið við sögu í síðasta leik liðsins gegn Stjörnunni. Talsvert hefur verið rætt um Guðmund í sumar og spilatíma hans í Kópavoginum.

Hann hefur lítið spilað en þær mínútur sem hann hefur klipið, virðast pirra stuðningsmenn Blika. Þannig kom fram í Dr. Football að baulað hefði verið á Guðmund þegar hann kom við sögu gegn Stjörnunni.

,,Hann lendir upp á kant við stuðningsmenn Breiðabliks, þeir hafa látið hann finna fyrir tevatninu í allt sumar. Sem endar með því að þrátt fyrir að Breiðabliks sé með félagsfræðing í vinnu, og reyni að halda öllum góðum. Þá er Guðmundur Böðvar hættur,“ sagði Hjörvar Hafliðason í þættinum.

Hjörvar veltir því fyrir sér af hverju stuðningsmenn Blika séu að ráðast á mann, sem hefur lítið haft með árangur liðsins að gera.

,,Hann er búinn að fá nóg af árásum, steininn tók úr þegar árásirnar héldu áfram gegn Stjörnunni. Hvað var verið að ráðast á hann? Það er ekki eins og hann sé að taka stóran tékka. Gefa alla þessa tíma í þetta og fá svona.“

Kristján Óli Sigurðsson, sjálfur Höfðinginn er ekki sáttur með framkomuna.

,,Þeir púa á hann, þegar hann kemur inn gegn Stjörnunni. Af hverju er ekki púað á þessu sem eru ekki að vinna eitt slakasta lið Stjörnunnar síðustu ár? Ég skil ekki svona, þetta eru kaldar kveðjur. Hefur staðið sig ágætlega, ekki besti fótboltamaðurinn og hann veit. Hann er mikilvægur í klefanum og ég veit að leikmenn Breiðabliks eru ekki sáttir með þessa framkomu stuðningsmanna. Félagsfræðingurinn ætti loksins að fara að vinna fyrir kaupinu sínu.“