Það vakti athygli í gær þegar Romelu Lukaku framherji Inter birtist í viðtali að gagnrýna Manchester United og hvernig félagið kom fram við sig.
Það sem vekur mesta athygli er að viðtalið var tekið í sumar þegar Lukaku var leikmaður Manchester United. ,,Það voru endalaust af sögum, að ég væri að fara og að félagið vildi ekki hafa mig. Það kom ekki neinn út og drap þessar sögur. Þetta voru þrjár eða fjórar vikur, ég beið eftir því að einhver myndi svara. Það gerðist ekki.“
Lukaku fékk nóg af sögum um sjálfan sig og bað um að fara. ,,Ég ræddi við félagið, sagði þeim að það væri betra að ég færi annað. EF félagið vill ekki verja leikmann eftir allar þessar sögusagnir, ég vildi bara heyra að Rom ætti að berjast fyrir sínu sæti.“
,,Ég er ekki heimskur, félagið heldur að við séum heimskir. Við erum það ekki, við vitum hverjir leka þessu í fjölmiðla. Ég sagði þeim að þetta væru ekki góð vinnubrögð.“
Ole Gunnar Solskjær, stjóri Manchester United var spurður um málið í morgun. ,,Ég ætla ekki að fara ofan í þessa laug,“ sagði Solskjær.
,,Viðtalið var tekið þegar hann var leikmaður hérna? Ég ætla ekki að tjá mig.“
