Gennaro Gattuso þjálfari AC Milan virðist staðfesta það að Gonzalo Higuain sé að yfirgefa félagið og ganga í raðir Chelsea.
Higuain er á láni hjá Milan frá Juventus en heldur nú á láni til Chelsea út þessa leiktíð.
Higuain hefur ekki náð flugi hjá Milan og verður ekki í leikmannahópi liðsins gegn Genoa.
,,Ég vil vera heiðarlegur, við áttum ömurlega æfingu í morgun út af öllum þessum sögusögnum. Ég talaði við Higuain eftir æfinguna,“ sagði Gattuso.
,,Ég virði hans ákvörðun, hann hefði getað gert meira og við kannski lika til að hjálpa honum.“
Maurizo Sarri, stjóri Chelsea og Higuain unnu saman hjá Napoli þar sem framherjinn frá Argentínu raðaði inn mörkum.
