Bjarni Ólafur Eiríksson, varnarmaður Vals hefur ákveðið að taka sér frí frá fótbolta. Þetta staðfesti Sigurbjörn Örn Hreiðarsson, aðstoðarþjálfari Vals við 433.is.
Hjörvar Hafliðason, sjálfur Dr Football sagði frá þessu í þætti sínum í dag. Þar var sagt að Bjarni væri hættur, Valsmenn vona að þeir geti fengið hann til að vera með í sumar.
Bjarni hefur verið einn besti leikmaður Pepsi deildarinnar frá því að hann snéri heim úr atvinnumensku árið 2013.
Hann hefur hjálpað Val að vinna tvo bikarmeistaratitla og tvo Íslandsmeistaratitla á þeim árum. Bjarni verður 37 ára á þessu ári.
,,Hann er í fríi þessa stundina og svo sjáum við bara hvað setur, við munum reyna að fá hann til að vera með í sumar,“ sagði Sigurbjörn í stuttu samtali við 433.is.
Bjarni lék 21 A-landsleik fyrir Ísland á ferli sínum en hann lék mest í tíð Ólafs Jóhannessonar sem nú er þjálfari Vals.