Svo virðist sem Graeme Souness knattspyrnusérfræðingur þoli hreinlega ekki Paul Pogba, miðjumann Manchester United.

Souness er manna duglegastur við að gagnrýna Pogba og gerði það einnig eftir 0-3 sigur United á Young Boys í gær.

Þar skoraði Pogba tvö mörk en fyrra mark hans var frábært, miðjumaðurinn frá Frakklandi var fyrirliði United í leiknum.

,,Ef hann vill verða stjarna, þá verður hann að stjórna leikjum og gera þetta eins og alvöru leikmaður. Hann verður að vera stöðugur og vera leiðtogi,“ sagði Souness.

,,Hann er fyrirliði núna og hann verður að breyta viðhorfi sínu, hann þarf að hugsa um fótbolta.“

,,Ég gæti trúað því að hann sé ágætis drengur en ég hugsa oft hvort hann hugsi um fótbolta sem eitthvað grín.“

,,Ég efast oft um að hann æfi vel, það er það sem hann getur bætt.“