Wilfried Zaha kantmaður Crystal Palace er einn hættulegasti leikmaður ensku úrvalsdeildarinnar.

Crystal Palace treystir mikið á Zaha en 19 ára gamall gekk hann í raðir Manchester United.

Hann upplifði erfiða tíma á Old Trafford og var fljótur að fara frá félaginu. Sir Alex Ferguson keypti hann en var hættur þegar Zaha kom til félagsins.

Undir stjórn David Moyes náði hann ekki að finna sig og honum leið afar illa. ,,Ég var að eiga við þetta þegar ég var 19 ára, ég bjó einn í Manchester. Ekki nálægt neinum, félagið réð því hvar ég myndi búa,“ sagði Zaha.

Zaha kvartar undan meðferðinni frá United. ,,Félagið gaf mér ekki bíl eins og öllum öðrum leikmönnum, ég bjó í helvíti, einn. Ekki með fjölskyldu minni, ég var langt niðri.“

,,Ég átti fullt af peningum en var samt niðurlútur og þunglyndur. Fólk heldur að peningar og frægð búi til hamingju, þú færð ekki sömu umhyggju og aðrir.“