Steven Gerrard, fyrrum fyrirliði Liverpool hefur tjáð sig um þá Fernando Torres, Luis Suarez og Mohamed Salah.
Gerrard spilaði með þeim Torres og Suarez og þekkir því vel til þeirra en Salah kom til félagsins síðasta sumar frá Roma.
Hann hefur nú skorað 32 mörk mörk fyrir félagið á einu tímabili en Suarez náði mest að skora 31 mark á meðan Torres setti 33 mörk.
„Torres átti frábæra tíma hjá Liverpool en tímarnir hjá Suarez voru fleiri. Ef Suarez væri ennþá hjá félaginu væri hann að skora 30 mörk eða meira á hverju einasta tímabili,“ sagði Gerrard.
„Hann gerði líka meira en að skora, hann lagði upp og vann gríðarlega vel fyrir liðið á vellinum. Ég hallast því að Suarez ef ég á að gera upp á milli þeirra þriggja.“
„En ef Salah heldur áfram að vera stöðugur í nokkur ár í viðbót og tekst að vinna eitthvað með félaginu þá mun hann standa uppúr hjá mér. Torres og Suarez unnu ekki mikið með þessu félagi því miður,“ sagði hann að lokum.
