Gary Neville, fyrrum fyrirliði Manchester United telur að Paul Pogba, miðjumaður félagsins eigi ennþá framtíð hjá klúbbnum.
Pogba hefur ekki átt fast sæti í liði United í undanförnum leikjum en Jose Mourinho virðist ekki hafa mikla trú á honum þessa dagana.
Miðjumaðurinn er ósáttur með lítinn spilatíma en miklar vonir voru bundnar við hann þegar hann kom til félagsins, sumarið 2016.
„Paul Pogba hefur allt til þess að spila fyrir United, á því leikur enginn vafi. Hann þekkir það að spila stærstu leikina, hann gerði það með Juventus,“ sagði Neville.
„Það sem hann verður að gera er að sýna stöðugleika. Sumir segja að ástæðan fyrir því að þetta hafi ekki gengið hingað til sé vegna þess að hann er ekki að spila í réttri stöðu. Aðrir segja að hann sé ekki nægilega einbeittur.“
„Í fótbolta eru hlutirnir aldrei svartir og hvítir. Leikmaðurinn hefur sýnar ástæður og stjórinn líka en eins og þetta blasir við mér þá skortir hann einbeitingu á vellinum, oft á tíðum.“
„Það er alltaf pressa hjá United, ef þú tapar leik þá finnurðu fyrir þeirri pressu. Svoleiðis er það núna og svoleiðis hefur það alltaf verið. Pogba verður að aðlagast því,“ sagði Neville að lokum.
