Manchester United tók á móti Sevilla í síðar leik liðanna í 16-liða úrslitum Meistaradeildarinnar í kvöld en leiknum lauk með 2-1 sigri gestanna.

Það var Wissam Ben Yedder sem skoraði bæði mörk Sevilla í kvöld en Romelu Lukaku minkkaði muninn fyrir United í stöðunni 2-0.

Fyrri leik liðanna lauk með markalausu jafntefli á Spáni og því fer Sevilla áfram í 8-liða úrslitin.

Jose Mourinho, stjóri United var að vonum svekktur með leik sinna manna í kvöld.

„Þetta var leikur þar sem að fyrsta markið var alltaf að fara ráða úrslitum,“ sagði Mourinho.

„Við reyndum að sækja á þá af krafti frá fyrstu mínútu en þeir héldu boltanum vel og stjórnuðu leiknum. Við fengum fín færi til þess að skora en þeir skora fyrsta markið og þá varð þetta erfitt.“

„Eftir að þeir skora annað markið þá varð þetta ómögulegt. Við áttum fína spilakafla í leiknum, við náðum hins vegar aldrei stjórn á honum en það var ekkert að hugarfari minna manna eða ákefð.“

„Svona er fótboltinn, við töpuðum í dag. Á morgun er nýr dagur og það er leikur hjá okkur um helgina. Ég er ánægður með það að leikmenn sýni tilfiningar en það er ekki neinn tími fyrir eitthvað drama,“ sagði Mourinho að lokum.