Hólmbert Aron Friðjónsson, framherji Álasund er vægast sagt ósáttur með það stjórnendur félagsins, sem bönnuðu honum að fara í verkefni íslenska landsliðsins í janúar. Það vakti nokkra athygli í gær þegar Erik Hamren valdi hóp sinn sem fer til Katar, að Hólmbert væri ekki þar á meðal. Þessi öflugi framherji átti frábært tímabil með Álasund.
Hann raðaði inn mörkum þegar Álasund rétt missti af sæti í efstu deild Noregs, hann hafði sett stefnuna á að komast í hópinn í janúar. Ekki er um að ræða alþjóðlega leikdaga og því geta félög bannað leikmönnum að fara í verkefnið.
Það sem vekur mesta athygli er sú staðreynd að Aron Elís Þrándarson, sem er einnig leikmaður Álasunds fékk grænt ljós á að fara í verkefnið.
,,Ég er búinn að vera síðustu vikuna í að reyna að fá þetta í gegn, það hefur ekkert gengið. Ég fékk bara þau skilaboð að félagið myndi ekki leyfa þetta, þetta væri frí leikmanna. Eftir langt og strangt tímabil, þá ætti ég að hvíla mig. Mér fannst það svo sem eðlileg skýring en ég skil þá ekki af hverju Aron Elís fær þá að fara,“ sagði Hólmbert þegar 433.is ræddi við hann í dag, hann er staddur á Íslandi í fríi sínu.
,,Ég var og er hrikalega ósáttur, ég spilaði síðustu tvo leikina gegn Stabæk hálf meiddur en ég bjóst samt við því að fá að fara í þetta verkefni. Ég skil ekki af hverju klúbburinn gefur grænt ljós á Aron en ekki mig.“
Smelltu hér til að sjá landsliðshópinn sem Erik Hamren valdi
Þetta verkefni í janúar hefur oftar en ekki reynst góður gluggi fyrir leikmenn sem eru ekki í náðinni að koma inn og sanna ágæti sitt. ,,Mér finnst þetta mjög leiðinlegt, ég hefði viljað fá þetta verkefni til að sanna mig. Það hefði getað orðið til þess að maður ætti meiri möguleika í framtíðinni að vera í landsliðinu. Ég er búinn að láta Álasund vita, hversu ósáttur ég er.“
Eftir frábært tímabil með Álasund er fjöldi liða sem hefur áhuga á að kaupa Hólmbert og það gæti verið ein ástæða þess að félagið vill ekki hleypa honum í verkefnið, hann gæti meiðst.
,,Ég veit það ekki, mér finnst þetta bara mjög skrýtið. Af hverju í fjandanum fæ ég ekki að fara? Þeir segja að málin hjá mér og Aroni séu ekki eins, ég skil þetta ekki.“
,,Ég hef heyrt af miklum áhuga frá öðrum liðum en það er ekkert sem er fast í hendi, þessi mál eru bara í skoðun og það kemur bara í ljós.“
