Graeme Souness sérfræðingur Sky Sports er duglegur að taka Paul Pogba miðjumann Manchester United fyrir.

Souness gerði það á Sky í gær en Pogba gerði sig sekan um slæm mistök í fyrra marki Chelsea í 2-2 jafntefli um helgina.

Þar nennti Pogba ekki að elta Antonio Rudiger sem fékk frían skalla að marki og skoraði.

,,Ég held að United sé að missa þolinmæðina á honum, þú getur ekki sem þjálfari endalaust verið að segja leikmanni hvað hann á að gera,“ sagði Souness.

,,Hann er með ótrúlegan líkama í íþróttir, hann er stór, hann er sterkur og getur hlaupið hratt. Maður myndi halda að þetta ætti að vera í lagi hjá honum.“

,,Þú þarft ekki að vera stór og sterkur til að koma í veg fyrir að einhver fái frían skalla að marki, ég gæti stoppað Rudiger þarna, ef þú hefur áhuga á.“

,,Hann er með frábæra tækni, frábæran líkama, hann gerir einföldu hlutina ekki rétt. Það er leikmaður þarna sem getur allt.“

,,Ég er sagður vera sá maður sem gagnrýni hann mest en stjóri hans er heldur ekki sáttur, ég var stjóri eins og Jose og maður hugsar bara hversu magnaður Pogba gæti orðið ef hann bara myndi hlusta.“

,,Þú hættir ekkert að læra 25 ára, ef hann telur sig vera hinn fullkomna leikmann í dag þá verður hann ekkert betri.“

,,Hann ætti að mæta á hverjum degi, hlusta á þjálfarana, eldri leikmenn og hafa áhuga á að bæta sig. Ég er ekki viss um að það sé málið, hann gæti orðið magnaður leikmaður.“