Philippe Coutinho er að ganga til liðs við Barcelona en þetta var staðfest í gær.

Kaupverðið er 145 milljónir punda og mun hann skrifa undir fimm og hálfs árs samning við spænska liðið.

Hann lenti í Barcelona á laugardag og mun gangast undir læknisskoðun hjá félaginu í dag og skrifa undir samning.

Þar sem Coutinho má ekki spila í Meistaradeildinni þá reyndi Liverpool að fá hann á láni út tímabilið.

Þeirri hugmynd hafnaði Barcelona og Coutinho var á sömu skoðun.

,,Þetta snýst ekkert um peninga,“ sagði Coutinho um félagaskipti sín.

,,Þetta er um tækifærið til að spila fyrir Barcelona, búa í Barcelona,“ sagði kappinn.