Dagný Brynjarsdóttir leikmaður íslenska landsliðsins verður ekki með landsliðinu á þessu ári.

Dagný er ófrísk og mun eignast sitt fyrsta barn í júní. Um er að ræða einn besta leikmann kvennalandsliðsins síðustu árin.

Dagný lék síðast með Portland Thorns í Bandaríkjunum og varð þar meistari með liðinu.

Dagný er 26 ára gömul og er öflugur miðjumaður sem nú tekur sér frí frá fótbolta.

,,Það er vandmeðfarið hvernig maður svarar, það eru blendar tilfinningar. Hún er lykilmaður í liðinu, einn af þremur mikilvægustu leikmönnum liðsins,“ sagði Freyr Alexandersson landsliðsþjálfari um málið.

,,Ég hefði viljað hafa hana með en auðvitað gleðst ég fyrir hennar hönd, ég vona bara að allt muni ganga vel. Ég hef þekkt og þjálfað hana lengi, þetta er gleði fyrir hennar hönd. Það er mikill söknuður i frábærum leikmanni.“

,,Án efa ef allt gengur eðlilega fyrir sig í þessu ferli þá verður hún mætt í toppform fljótlega eftir fæðingu, ég horfi ekki á að hún geti spilað í september. Það er of stutt. Það er mánuður síðan ég vissi þetta.“

,,Ég muni prófa í leiknum á móti Noregi, þá mun ég færa Rakel Hönnudóttir.“