Paul Ince, fyrrum fyrirliði Manchester United segir að félagið þurfi að kaupa fjóra sterka leikmenn í sumar.

Ince telur að ef félagið ætli sér að berjast á öllum vígstöðum þá þurfi Jose Mourinho að styrkja hópinn hjá sér enn frekar en Alexis Sanchez gekk til liðs við United í vikunni.

United situr sem stendur í öðru sæti ensku úrvalsdeildarinnar með 53 stig og er 12 stigum á eftir Manchester City.

„Þetta verður ansi stórt sumar fyrir Manchester United. Þetta er félag sem reynir stöðugt að bæta sig og vill vinna alla bikara sem í boði eru,“ sagði Ince.

„Það þýðir oft á tíðum að núverandi leikmenn liðsins missa sæti sitt í liðinu en þannig virkar fótboltinn. Ég býst við þremur til fjórum sterkum leikmönnum.“

„Það eru nokkrar stöður á vellium sem þarf að bæta og Jose Mourinho er ennþá að móta sitt lið. Ég tel að hann muni reyna að fá vinstri bakvörð, þótt hann hafi hrósað Luke Shaw mikið á dögunum.“

„Danny Rose er leikmaður sem gæti styrkt United. Svo er spurning með hægri bakvarðastöðuna, hvað á Valencia mikið eftir? Liðið gæti líka þurft að styrkja sig fremst á vellinum ef Zlatan fer,“ sagði hann að lokum.