Paul Pogba var allt í öllu í 0-3 sigri Manchester United á Young Boys í gær, um var að ræða fyrsta leik liðanna í Meistaradeild Evrópu.

Pogba skoraði fyrra mark sitt með frábæru skoti en það seinna kom af vítapunktinum.

Miðjumaðurinn hafði klikkað á síðustu spyrnu sinni en hann var ekki í nokkrum vafa um að taka spyrnuna.

,,Ég efaðist ekki í eina sekúndu, ég veit að klúðraði spyrnunni á undan. Joe Hart las mig þar, ég geri ekki sömu mistökin,“ sagði Pogba.

Pogba þakkar Jose Mourinho fyrir traustið en samband þeirra virðist vera að batna eftir erfiða tíma.

,,Ég fékk traustið frá samherjum mínum, þeir leyfðu mér að taka spyrnuna. Stjórinn hafði líka mikla trú á mér.“