Þórarinn Þórarinsson, blaðamaður og bakþankahöfundur Fréttablaðsins, segir að þó KR-liðið sé ekki í baráttunni um Íslandsmeistaratitilinn í Pepsi-deild karla, fyrir neðan lið eins og Val, Stjörnuna og Breiðablik sé KR búið að vinna.

Þetta segir Þórarinn í spaugilegum pistli á baksíðu Fréttablaðsins í dag. Þórarinn ólst upp á Melunum, bjó þar fyrstu ár ævi sinnar, en segir að foreldrar hans hafi flutt hann „nauðugan“ í Kópavoginn.

„Melarnir eru fallegasti og besti staður á landinu og sá sem býr þar þarf ekki að leita lengra frekar en hann kærir sig um. Og ég kærði mig bara ekkert um að fara.“

Þórarinn bætir við að KR hafi mest tilfinningagildi fyrir þá sem búa á Melunum eða eru þaðan og fótboltafélagið í Frostaskjólinu sé sverð þeirra, sómi og röndóttur skjöldur, í blíðu og stríðu.

„Saga KR er ekki óslitin sigurganga. Við getum samt alveg sætt okkur við að fá ekki titil nema á svona tuttugu til þrjátíu ára fresti vegna þess að KR er miklu meira en bara fótbolti, eða körfubolti ef út í það er farið.“

Þórarinn nefnir að það að vera KR-ingur sé löng kennslustund í þolinmæði þar sem mótlæti og vonbrigði eigi það til að banka upp á. „Við KR-ingar erum svolítið eins og Jedi-riddarar þar sem við höfum í gegnum áratugina staðið andspænis ofureflinu, vitandi að jafnvel í ósigrinum erum við betri en andstæðingarnir, sameinaðir í hatri á okkur.“

Hann segir síðan að styrkur KR og stærð séu fólgin í að sama hvernig gengur þá elski andstæðingar KR að hata liðið. „Leggja jafnvel stundum meira upp úr hatri sínu á KR en fylgispekt við eigið lið. Fyndið, vegna þess að þannig sigrum við líka þegar við töpum.“

Þórarinn segir að endingu að hann sofi þess vegna alveg ágætlega á Grenimelnum „á meðan brimsalt sjávarrokið lemur á gluggarúðunum og Breiðablik, úthverfaliðið sem svikararnir pabbi minn og litla systir gengu til liðs við á meðan ég afplánaði Kópavoginn, er einu sæti fyrir ofan okkur í deildinni. Við KR-ingar erum nefnilega búnir að vinna þótt mótið sé ekki búið.“