Mino Raiola, umboðsmaður Paul Pogba, ákvað að tjá sig á Twitter í gær og ræddi þar fyrrum miðjumann Manchester United, Paul Scholes.

Scholes hefur gagnrýnt franska miðjumanninn í sumar en hann hefur borið fyrirliðaband United í fyrstu tveimur leikjum tímabilsins.

Raiola er kominn með nóg af Scholes og segir honum að gerast yfirmaður knattspyrnumála United svo hann geti sagt félaginu að selja leikmanninn.

Sir Alex Ferguson, fyrrum stjóri United, líkaði aldrei við Raiola sem kom Pogba burt frá United árið 2012 áður en hann samdi aftur við liðið 2016.

Ummæli Ferguson um Raiola vekja nú athygli en hann er alls enginn aðdáandi umboðsmannsins sem á það til að vera mjög litríkur.

,,Það eru einn eða tveir umboðsmenn í boltanum sem mér líkar einfaldlega ekki við og Mino Raiola er einn af þeim,“ sagði Ferguson um Raiola.

,,Paul Pogba? Hann er með ömurlegan umboðsmann. Algjöran fávita. Við vissum vel hversu góður hann var og hann er það enn. Við buðum honum besta samninginn.“