Breiðablik er nú með tveggja stiga forskot á toppi Pepsi-deildarinnar eftir sigur á KR í kvöld.
Aðeins eitt mark var skorað í Kópavogi en það gerði varamaðurinn Alexander Helgi Sigurðarson fyrir heimamenn.
Hér má sjá það góða og slæma úr leiknum.
Plús:
Blikar eru komnir á toppinn! Það gerir mikið fyrir þá grænu í framhaldinu en Stjarnan og Valur eiga þó leik til góða.
Blikar eru svo geggjaðir þegar þeir sækja hratt á þig. Hraðinn í sókninni er mikill og skapaði verulegan usla í kvöld.
Bestu leikmenn KR náðu sér ekki á strik í kvöld og það er einfaldlega bara vörn Blika að þakka. Svo sterkir aftast og fá á sig fá mörk.
Thomas Mikkelsen gæti verið sá maður sem gerir gæfumuninn fyrir Blika. Framherjinn er frábær leikmaður, tryggir hann þeim titilinn?
Varamaðurinn Alexander Helgi Sigurðarson skoraði mark Blika í leiknum með skoti fyrir utan teig. Lét bara vaða og það borgaði sig, vel gert! Hann var kallaður til baka úr láni á dögunum og svarar kallinu strax.
Mínus:
Á móti þá set ég spurningamerki við Beiti í marki KR. Skot Alexanders var ekki fast og hefði hann átt að gera betur.
Atvik leiksins kom í fyrri hálfleik er Óskar Örn Hauksson átti skot að marki Blika sem Gunnleifur missti í markinu. Boltinn virtist hafa farið yfir línuna, ég smelli þessu í mínus. Mark tekið af KR þó að það sé erfitt að staðfesta það.
Fyrri hálfleikurinn í kvöld var heilt yfir ansi dapur. Við fengum lítið af færum og lítið af fjöri. Aðeins skárra í þeim seinni.
Rúnar Kristinsson veit alveg hvað hann er að gera en af hverju er Albert Watson mættur aftur í byrjunarliðið? Tveir sigurleikir í röð án hans.