Jose Mourinho, stjóri Manchester United mætti svo sannarlega tilbúinn á blaðamannafund í gærdag.

Stjórinn mætti með minnisblað þar sem hann las upp tólf mínútu langa ræðu um árangur sinn hjá félaginu síðan hann tók við United árið 2016.

Atvikið vakti að sjálfsögðu mikla athygli en United féll úr leik í Meistaradeildinni í vikunni eftir 1-2 tap gegn Sevilla á Old Trafford.

Mourinho ákvað hins vegar að nota tækifærið og hrósaði tveimur leikmönnum liðsins en restina af leikmannahópi sínum gagnrýndi hann.

„Við vorum að spila á móti liði sem hefur náð miklu betri árangri en Manchester United í Evrópukeppnum, undanfarin sjö ár. Haldið þið að enginn leikmaður Sevilla kæmist í liðið hjá mér? Það er fullt af leikmönnum hjá Sevilla sem ég gæti notað,“ sagði Mourinho.

„Það er ekki hægt að ætlast til þess að ég sé að fara gagnrýna mína leikmenn og nafngreina þá alla hér. Ég vil frekar segja að Lukaku og Matic eru að standa sig mjög vel en aðrir eru ekki að standa sig, svo einfalt er það.“

„Leikmennirnir verða að læra að höndla pressuna og þær væntingar sem gerðar eru til þeirra. Þeir þurfa að læra á lífið og þegar að það gerist þá verða þeir sterkari fyrir vikið,“ sagði stjórinn að lokum.