Andre Villas-Boas, fyrrum stjóri Tottenham segir að Harry Kane, framherji liðsins þurfi að yfirgefa félagið ef hann vill vinna titla.
Kane hefur verið magnaður á þessari leiktíð en það var Villas-Boas sem gaf honum fyrst tækifæri með aðalliði Tottenham á sínum tíma.
Framherjinn er reglulega orðaður við Real Madrid en verðmiðinn á honum er talinn vera í kringum 200 milljónir punda.
„Þetta snýst allt um það hvað Kane vill afreka í framtíðinni, vill hann halda áfram að bæta sig sem leikmaður,“ sagði stjórinn fyrrverandi.
„Ef hann vill vinna stóra titla þá þarf hann að fara frá Tottenham. Ef hann vill hins vegar halda áfram að vera í umræðnni og halda stöðugleika þá verður hann áfram.“
„Tottenham er í dauðafæri á að verða stórt félag. Þeir eru að byggja frábæran völl, æfingasvæðið er glæsilegt og það er mikil uppbygging í gangi hjá félaginu.“
„Þeir eru með frábæran stjóra en það sem vantar hjá liðinu eru titlar en það er markmið allra knattspyrnumanna, að vinna titla,“ sagði hann að lokum.
