Alexis Sanchez er að ganga til liðs við Manchester United en frá þessu greina enskir fjölmiðlar.
Sanchez mun fara til United í skiptum fyrir Henrikh Mkhitaryan en sá fyrrnefndi verður samningslaus í sumar.
Manchester City var lengi á eftir leikmanninum og virtist Pep Guardiola, stjóri liðsins vera svekktur yfir því að missa af leikmanninum á blaðamannafundi í dag.
„Alexis Sanchez er að fara til United og ég vil óska þeim til hamingju með það,“ sagði stjórinn.
„Það er engu við þetta að bæta. Skoðun mín á leikmanninum hefur ekki breyst. Það var ánægjulegt að vinna með honum hjá Barcelona.“
„Ég óska honum alls hins besta,“ sagði hann að lokum.
