Manchester United tók á móti Stoke City í ensku úrvalsdeildinni í kvöld en leiknum lauk með 3-0 sigri heimamanna.
Antonio Valencia kom United yfir snemma leiks áður en Anthony Martial tvöfaldaði forystu United á 38. mínútu og staðan því 2-0 í hálfleik.
Romelu Lukaku gerði svo út um leikinn á 72. mínútu og lokatölur því 3-0 fyrir heimamenn.
Jose Mourinho, stjóri United vildi ekki tjá sig um það hvort Alexis Sanchez væri að koma til félagsins.
„Stoke mætti hingað og reyndi að spila fótbolta. Þeir voru óhræddir við að spila boltanum og gerðu okkur erfitt fyrir í fyrri hálfleik,“ sagði Mourinho.
„Ég horfði ekki á Liverpool vinna City, sá leikur breytir engu. Þeir eru með góða forystu, ég þekki þessar aðstæður vel, örlögin eru í þeirra höndum.“
„Ég hef ekkert að segja um Alexis Sanchez, hann er leikmaður Arsenal og ef hann verður þar áfram er það frábært fyrir þá. Ef hann kemur til okkar er það frábært fyrir okkur og ef hann fer eitthvað annað er það frábært fyrir þá,“ sagði hann að lokum.
