,,Þetta verkefni gefur mörgum leikmönnum reynslu, þetta fer í reynslubankann,“ sagði Heimir Hallgrímsson landsliðsþjálfari Íslands eftir 4-1 sigur á Indónesíu í æfingarleik í dag.

Albert Guðmundsson skoraði þrennu og Arnór Smárason eitt mark í sigrinum.

,,Þetta var flott stemming, þetta var stærsti leikurinn sem margir hafa spilað. Mikið af áhorfendum og stórt verkefni, þetta hjálpar inn í framtíðina. Þetta hafa verið flottir átta dagar til að fara yfir hlutina, ég sá mun á þessum leik og þeim fyrri er varðar skipulag og þá hluti sem við viljum gera.“

,,Fyrri hálfleikurinn var kannski ekki góður, sendingar voru ekki góðar. Við vorum með tvo stóra framherja og vildum svolítið sparka á þá en boltarnir voru ekki góðir. Í síðari hálfleik var ákveðið að spila meira á jörðinni og það gekk miklu betur.“

Það eru ekki bara leikirnir sem skipta máli heldur horfir Heimir mikið í það hvernig leikmenn eru á æfingum og utan vallar.

,,Þú getur ekki alltf metið leikmenn nema að vera þeim í svona ferð, sjá hvernig þeir eru hóp og hvernig menn eru í því umhverfi sem við erum með. Hvernig þeir passa í leikstíl okkar.“

Eins og fyrr segir stal Albert Guðmundsson sviðljósinu í dag eða hvað?

,,Hann gerði í seinni hálfleik það sem var lagt upp með, var framarlega á vellinum og gerði vel. Þar er hann hættulegur, hann var að koma of langt niður á völlinn og fara í hlutverk sem aðrir eiga að sinna. Hann fékk margar mínútur núna, hann hefur aðlagast því sem við erum að reyna að gera og uppskar eftir því. Það er samt hundleiðinlegt að skora þrennu en Siggi Dúlla stelur sviðsljósinu, það eru allir að tala um Sigga en ekki neinn um Albert, „sagði Heimir léttur og átti þar við að Siggi hefði stjórnað víkingaklappinu eftir leik.