Danny Murphy, fyrrum miðjumaður Liverpool telur að Jordan Henderson, fyrirliði Liverpool sé betri leikmaður en Naby Keita.

Félagið lagði mikið á sig til þess að fá Keita á Anfield en hann mun ganga til liðs við Liverpool, næsta sumar fyrir rúmlega 66 milljónir punda.

Á meðan stuðningsmenn Liverpool eru mjög spenntir fyrir Keita þá hafa þeir verið duglegir að gagnrýna Henderson og finnst mörgum hann ekki nægilega góður til þess að spila fyrir félagið.

„Ég er ekki viss með Keita, ekki miðað við það sem ég hef séð af honum,“ sagði Murphy á dögunum.

„Hann er mikill íþróttamaður og býr yfir hæfileikum. Hann hefur ákveðna kosti, líkt og Jordan Henderson. Hann er atvinnumaður, góður íþróttamaður og skilar alltaf sínu.“

„Hann er hins vegar ekki að búa mikið til og þannig leikmann þarftu ef þú vilt berjast um enska úrvalsdeildartitilinn eða vinna Meistaradeildina. Leikmenn eins og Gerrard, Souness, Alonso, Mascherano, þessi týpa af leikmanni.“

„Ég er ekki viss um að Keita sé betri leikmaður en Henderson,“ sagði hann að lokum.