Manchester City tók á móti Watford í kvöld í ensku úrvalsdeildinni en leiknum lauk með 3-1 sigri heimamanna.

Raheem Sterling kom City yfir eftir 38. sekúndur og Christian Kabasele skoraði svo sjálfsmark, 12. mínútum síðar og staðan því 2-0 í hálfleik.

Sergio Aguero kom City í 3-0 á 63. mínútu áður en Andre Gray minnkaði muninn fyrir Watford undir lok leiksins en lengra komust þeir ekki og niðurstaðan því 3-1 fyrir City.

Pep Guardiola, stjóri City var sáttur með stigin þrjú en hann er ekki hrifinn af leikjaálaginu á Englandi þessa dagana.

„Við spiluðum vel. Við töpuðum stigum gegn Palace og ræddum það fyrir leikinn að við ætluðum að svara því hér gegn Watford og við gerðum það,“ sagði stjórinn.

„Við gerðum fimm breytingar á liðinu en það er ekki mér að kenna. Ég veit það að á Englandi þarf sýningin að halda áfram en þetta er ekki eðlilegt og ég er ekki einn um þá skoðun.“

„Við erum að drepa leikmennina. Knattspyrnusambandið er ekki að hugsa um hag leikmannanna. Þeir spila ellefu mánuði í röð. Það þarf að vernda leikmennina svo þeir geti haldið áfram að sýna sömu gæði.“

„Leikjaálagið hérna er of mikið en ég sé ekki framá að það muni breytast í framtíðinni,“ sagði hann að lokum.