Philippe Coutinho, sóknarmaður Liverpool er eftirsóttur af Barcelona.
Félagið lagði fram þrjú tilboð í hann, síðasta sumar en Liverpool stóð fast í lappirnar og hafnaði þeim öllum.
Guardian greinir frá því í dag að Liverpool vilji fá að minnsta kosti 130 milljónir punda fyrir leikmanninn.
Talið er næsta víst að Barcelona muni leggja fram tilboð í hann í janúarglugganum en hvort að spænska liðið sé tilbúið að greiða uppsett verð þarf að koma betur í ljós.
Coutinho hefur verið frábær fyrir Liverpool á þessari leiktíð en hann var ekki með í 2-1 sigri liðsins á Burnley í gær vegna meiðsla.
