Alþjóðlega myndlistarsýningin „Rúllandi snjóbolti/11“ verður opnuð laugardaginn 14. júlí næstkomandi kl. 15 í Bræðslunni á Djúpavogi sem breytt hefur verið í sýningarsal. Alls taka 28 listamenn frá Íslandi, Evrópu, Ameríku og Asíu þátt í sýningunni sem er skipulögð af Chinese European Art Center (CEAC). Heiðursgestur opnunarhátíðar sýningarinnar verður Guðni Th. Jóhannesson forseti Íslands.

Sýningin sem er ein stærsta samtímalistasýning á Íslandi er samvinnuverkefni Djúpavogshrepps og CEAC. Þessi kínversk-evrópska menningarmiðstöð er löngu orðin þekkt í kínverska og evrópska listaheiminum og hefur staðið fyrir mörgum, stórum sýningum í Kína og á Íslandi. Sýningin Rúllandi snjóbolti hlaut Menningarverðaun SSA árið 2015 og tilnefningu til Eyrarrósarinnar árin 2016, 2017 og 2018.

CEAC er sjálfseignarstofnun og var stofnuð árið 1999 af Ineke Guðmundsson með fjárhagslegum stuðningi eiginmanns hennar, Sigurðar Guðmundssonar. Eitt af markmiðum CEAC er að stuðla að menningarlegum samskiptum milli Kína og Vesturlanda.

Djúpavogshreppur er aðili að Cittaslow hreyfingunni sem eru samtök lítilla sveitarfélaga í 30 löndum og ríkjum víðsvegar um heiminn. Markmið Cittaslow er að auka lífsgæði og ánægju fólks með því að veita hnattvæðingu, einsleitni og hraðaáráttu í borgum og bæjum nútímans viðnám og heiðra þess í stað sérstöðu hvers sveitarfélags fyrir sig. Cittaslow sveitarfélög leggja meðal annars áherslu á verndun náttúru og menningarminja, fegrun umhverfis, umhverfisgæði, eflingu staðbundinnar matarmenningar, gestrisni, kurteisi og vinsamlegt viðmót. Það er í þeim anda sem Djúpavogshreppur tekur þátt í sýningunni í samvinnu við CEAC.

Listamenn sem taka þátt í ár eru:

Anna Líndal / Árni Guðmundsson / Arnoud Noordegraaf / Áslaug Thorlacius / Bill Aitchison / Björn Roth / Erling Klingenberg / Fahrettin Orenli / Gerald Van Der Kaap / Hrafnkell Sigurðsson / Irina Birger / Kan Xuan / Magnús Pálsson / Nie Li / Oey Tjeng Sit / Peer Veneman / Persijn broersen & Margit Lukacs / Ráðhildur Ingadóttir / Ragnhildur Jóhanns / Ronny Delrue / Svava Björnsdóttir / The Hafnia Foundation / Þór Vigfússon / Wei Na / Yang Ah Ham / Yang Zhi Qian / Zhang Zhen Xue.

Sjá nánar á Facebooksíðu sýningarinnar og heimasíðu Djúpavogshrepps.