Vel skrifað og meistaralega sett upp

Í menningarannál ársins 2017 sem birtist í áramótablaði DV verður stiklað á stóru og rifjað upp það helsta sem átti sér stað í lista- og menningarheiminum á árinu sem er að líða. Leitað var til hóps álitsgjafa úr ýmsum kimum íslensks menningarlífs við gerð samantektarinnar. Daglega frá jólum og fram yfir þrettándann munu vangaveltur álitsgjafanna birtast í heild sinni á menningarsíðu DV.is. Þar líta þeir yfir árið, rifja upp það markverðasta og eftirminnilegasta í íslensku listalífi árið 2017 og greina stöðuna í menningunni í árslok.

Yean Fee Quay verkefnastjóri sýninga hjá Listasafni Reykjavíkur.

Mynd: DV ehf / Sigtryggur Ari

Yean Fee Quay

Verkefnastjóri sýninga hjá Listasafni Reykjavíkur.

Hvað var eftirminnilegasta listaverk eða menningarafurð ársins 2017?

Ég myndi segja að leikrit Guðmundar Steinssonar, Húsið, sem sýnt var í Þjóðleikhúsinu, sé mér ofarlega í huga af tveimur ástæðum. Í fyrsta lagi er þetta vel skrifað og meistaralega sett upp leikverk sem opinberar blæbrigði þess að vera manneskja og standa frammi fyrir lífinu og breytingum sem verða á því. Samtölin og flæði atburða voru rakin sundur með svo frábærlega frjálslegum hætti að flest okkar sem búum við svipaðar aðstæður myndum þekkja þær í okkar eigin lífi og sjá jafnvel hluta af okkur sjálfum þar sem við erum túlkuð af leikurunum. Hin ástæðan er þátttaka „ekki íslenskra“ leikara í síðasta hluta sýningarinnar. Að sjá þá taka yfir sviðsljósið togaði í ákveðna strengi sem ég hafði verið lengi að velta fyrir mér vegna myndlistarsýningar. Sýningin stendur nú yfir og ég verð að viðurkenna að Húsið átti þátt í að móta hluta af þeim ákvörðunum sem ég tók sem sýningarstjóri.

Hvað þótti þér markverðast í menningarlífinu á Íslandi á árinu (gott eða slæmt, viðburður, atvik, bransafrétt, trend, nýliði, listræn átök, menningarpólitísk ákvörðun eða hvað sem þér dettur í hug)?

Mynd: Julía Runólfs

Ákveðinn áfangi náðist í baráttunni Við borgum myndlistarmönnum þegar Borgarráð Reykjavíkur samþykkti að veita Listasfni Reykjavíkur 8,5 milljóna aukafjárveitingu til að greiða listamönnum þóknun og mæta útgjöldum þeirra við að búa til sýningar og vegna þátttöku þeirra í viðburðum sem eru hluti af dagskrá Listasafns Reykjavíkur árið 2018. Þetta er stórt stökk fram á við, sem Jóna Hlíf Halldórsdóttir, formaður Sambands íslenskra myndlistarmanna er upphafsmaðurinn að, og skref í átt að þeirri fagmennsku sem margir myndlistarmenn eiga að venjast í öðrum borgum.

Hvað finnst þér hafa einkennt menningarlífið/ -umræðuna á Íslandi árið 2017?

Sem verkefnastjóra í listasafni sýnist mér 2017 lofa bjartari framtíð fyrir menningarlífið á Íslandi.