Heimildarmyndin Keep Frozen eftir Huldu Rós Guðnadóttur verður heimsfrumsýnd á hinni virtu Visions du Réel hátíð í Sviss þann 17. apríl næstkomandi en þar keppir myndin í svokölluðum Regard Neuf flokki. Visions du Réel er ein rótgrónasta og virtasta heimildamyndahátíð í Evrópu og munu þær Hulda Rós og Helga Rakel Rafnsdóttir framleiðandi myndarinnar verða viðstaddar frumsýninguna. Framleiðslufyrirtæki er Skarkali ehf.
Annað fagnaðarefni fyrir aðstandendur Keep Frozen er það að Deckert Distributions mun dreifa myndinni á heimsvísu en fyrirtækið er eitt það stærsta í Evrópu á sviði heimildarmynda.
Keep Frozen fjallar um hóp af mönnum sem starfa við uppskipun í gömlu Reykjavíkurhöfn. Löndunarstarfið er áhættusamt og erfitt og hentar ekki hverjum sem er. Mistök í starfi geta verið dýrkeypt og kostað gríðarlega háar fjárhæðir, jafnvel mannslíf. Keep Frozen er mynd um mannsandann og það að sigrast á sjálfum sér.
Í stuttu máli mætti lýsa atburðarrásinni svona: Á kaldri vetrarnóttu siglir drekkhlaðinn frystitogarin inn í gömlu höfnina í Reykjavík. Í frystilestinni eru 25.000 frosnir fiskikassar, hitastigið er -35 gráður og hópur manna hefur tvo sólarhringa til þess að tæma skipið. Á meðan við fylgjumst með þeim framkvæma hið ómögulega, heyrum við sögur af karlmennsku og rómantík, gamni og dauðans alvöru.
Stefnt er að því að frumsýna Keep Frozen á Íslandi á vordögum 2016.
Hér má finna frekari upplýsingar um myndina.
Keep Frozen verður dreift á heimsvísu af hinu alþjóðlega dreifingarfyrirtæki Deckert Distribution:
http://deckert-distribution.com
Lokalag myndarinnar er Gvendur á eyrinni í sérstökum hátíðarbúningi Prins Pólós:
